هنا شقلبان
محّطة إذاعة حلاوة زمان
من القاهرة
و من كردفان
وسائر بلاد العرب
و اليابان
و من فنزويلا
و أيضا إيران
و من أّّي دار مستباحه
بفعل السياحه
مع الأمريكا ن
هنا شقلبان
محطة إذاعة حلاوة زمان
نقّدم إليكم بكّل اللغات
مراسح وسيما و جميع الفنون
صحافة و منابر
و تليفزيونات
و خطبا ف جوامع
و جبنة و زيتون
و نقزح و نركب جميع الموجات
و نبحث و نفهم
في كل الشؤون
ودايما نلعلع في كل الحالا
و لا حّد سامع
و لا يحزنون
وتسمع ما تسمع
دا ما يهّمناش
لأّن إحنا أصلا
بناكل بلاش
فخّليك في نفسك
وما تخّليناش نسّلط عليك القلم و الّلسان
هنا شقلبان
محطة إذاعة حلاوة زمان
يسّر الإذاعة
و ما يسّركوش
بهذي المناسبة
و ما بندعيكوش
نقّدم إليكم
و لا تقرفوش
شحاته المعّسل
بدون الرتوش
شنبدر سماسرة بلاد العمار
معمر جراسن للعب القمار
و خارب مزارع
و تاجر خضار
و عقبال أملتك
أمير الجيوش
و ما تقدرش تنكر
تقول ما أعرفوش
ما تقدرش أيضا
تقول ما أسمعوش
شحاته المعّسل
حبيب القلوب
يزيل البقع
والهموم والكرب
يأنفس
يأفين
يبلبع حبوب
و يفضل يهفلط
و لا تفهموش
وتفهم ما تفهم
دا ما يهمناش
لأّن انت فاهم و عامل طناش
ح تنكر وتخلف
ح اقول لك بلاش
ح تتعب دماغنا
و تتعب كمان
هنا شقلبان
محطة اذاعة زمان
لأن المخبى ظهر واستبان
وكل المسائل
بدت للعيان
وطلعت حكاوى
ونزلت كمان
عن التهريبه
وعن كيت وكان
وعن محسوبيه
وعن ألعبان
ظهر فى المدينه
كأنه الطوفان
وغرق مراكب
وسوح غيطان
و بعض المراكب
ح تغرق كمان
و أزمة مساكن
و أزمة أمان
وعالم بياكل
فى عالم جعان
و ريحة مؤامره
فى جو المكان
مخطط خيانه
مع الأمريكان
الدبح العشيره
وحرق المكان
وفيه ناس بترغى
ولازم بيان
كما ابلغونا
جميع الودان
لهذا وذاكا... وتلكم كمان
نقدم اليكم
عروسه وحصان
شحاته المعسل
وهذا البيان
هنا شقلبان
محطة اذاعة حلاوة زمان
بسم الله
سلام عليكم
وسلمون وموز
وأما المسائل
فهنجف ولوز
فيا اخوتي
ويا أخوات
اليكم بيانى
كما هو آت
جميع المسائل
تمام التمام
وكل الكلام دا
مجّرد كلام
فصبرا جميلا
ولا تقلقوش
وشغل الضغاين
أنا ما أقبلوش
ما فيش أى حاجه
علّي الطلاق والعتاق بالتلاته
ما فيه اى حاجه
وقدر كمان ان فيه أى حاجه ما فيش أّي
حاجه
ما لوش أى لازمه الكلام
و الّلجاجه
وعيب ان عيل يسوق السماجه
ويعمل لى باللو
ويعمل ديباجه
آنا بطبعى ضد السماسره الكبار
بحكم المنافسه
وحكم الجوار
لكن مش ف طبعى
انى أعمل فضيحه
لواحد زميلى
هبش كام صفيحه
ما كل الزمايل
بتهبش صفايح
وكل اللى جاى
مش زى اللى رايح
فيا ايها الشعب
صهين تفلعص
مساء التنفس
مساء الروايح
أخويا الامير بزرميط الايرانى
بعت لى السنه دى
عزمنى ودعانى
وأنا قبلت طبعا
ورحنا العزومه
وكانت وليمه
ما تحصلش تانى
د إيه المحمر
و إيه المكمر
وايه المشّمر
وايه الصوانى
وانا دماغى تعبت
ولفت صراحه
من الفخفخه
والهنا الاصفهانى
هناك يعنى مثلا
اذا شربت طافيه
تمز بكوارع
وبسطرمه ضانى
ما شفتش هناك
ناس بتحقد عليهم
ولا ناس بتشتم
فلان الفلانى
لأنه اشترى عزبتين
من شطارته
وحكمة ادارته
وطلع مبانى
وبعد الوليمه
استلمنا الهدايا
مفضض
ومدهب
وقز وقيشانى
وطبعا أخويا الأمير
قال لى حاجه
ح اقولهالكو طبعا
اذا الوقت ناسب
ح يطلع لى عيل
بدون اى حاجه
ويعمل لى فلحس
ويقعد يحاسب
دا حقد اشتراكى
أنا ما أقبلوش
ولو هو ابنى
أنا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه
وعايزنى اسيب البلد
من زمان
وأنا مش ح اسلم
واسيب الأمان
ولا بالبوليس والنيابه كمان
فيا ايها الشعب
كمل جميلك
وصبرا
واذلم حتيجى المصارى
وتاكل وتشرب
تبع ما يآتيك
وتغرق فى بحر العبيد والجوارى
وترسم حياتك
حسب ما يرائيلك
وتملا الحواري
فساقى وقصارى
تسبح بحمدك
وتشكر جميلك
وفضل الزباله
وطفح المجارى
ختاما سلاما
وآخر كلاما
ضرورا
يسود الهدوء والوئاما
فماذا والا
ح طربقها واللا
و اهّرب فلوسى
واسافر قواما
سلام عليكم
وسلمون وموز
بصفتى رئيسا
وابا
و جوز
أحمد فؤاد نجم
القاهرة/1976
