ايها الساده اللي مش ساده
اليكم نشرة الهمّ المعاده
في حديث خاص لاذاعة هس هس العالميّة
صرّح الوالي المعظّم
من ولاية ننه ننه
للولاية بتاعتنا احنا
الي عارف كل حاجة
اللي فاهم كل حاجة
واللي مش محتاج لحاجة
الا لشويّة عزيمة
على حبّة من ارادة
بس عايزين الصراحة
كان حديثه نيله خالص
سوري عفوا !!
كان حديثه حلو خالص
و المذيعة حلوة خالص
و الكلام كان حلو خالص
بس كان هايس و لايص
تّنك الساعتين بطوله
مش لاقي حاجة يقوله
و اللي بيقوله يعيده
و اللي بيعيده يقوله
خلّت العثمان بتاعنا
عقله خلبط خلطبيطه
قاله يخرب بيت أبوكي
قولي حاجة يا مصيبة
انتو ويّانا عليهم
ولاّ ويّاهم علينا
تنح المذكور وقالّي
يا بلاوي افهموني انا طول عمري حيادي
أعشق اللون الرّمادي
و أكره الفعل الإرادي
بس فكري زي فكر اللّي جابوني
كان ضروري يكون أُحادي
قاله عثمان يا عظمتك
يعني قصدك ديك دا تور
قاله ديك دا الّلي قصادك ولاّ طور ؟!
قاله عثمان شايفه ديك ... و اللّه أعلم !
قاله يبقى انت اللّي طور !
ليست هناك تعليقات:
إرسال تعليق