حاتجن ياريت ياخوانا مارحتش لندن ولا باريز
دي بلاد تمدين و نضافة و ذوق و لطافة و حاجة تغيظ
...
مالاقيتش جدع متعافي و حافي و ماشي يقشر خص
ولا شحط مشمرخ افندي معاه عود خلفه و نازل مص
ولا لب اسمر و سوداني و حمص و انزل يا تقزقيز
حاتجن ياريت ياخوانا مرحتش لندن ولا باريز
...
ولا واحد طالع يجري و واحد تاني بيجري وراه
و يقول ها هع حصلتك يابن اللي ابصر ايه عاملاه
لا الشارع غيط ياخوانا ولا احنا بدارة ولا احنا معيز
هتجن يا ريت ياخوانا مرحتش لندن ولا باريز
ولا عركة ف نص الليل دايرة بالحيل و ساحبها بوليس
قدامها جدع متجرجر وشه معور قال دا عريس
الخلق ماهي بتتجوز واشمعنى احنا مفيش تمييز
حاتجن ياريت ياخوانا مرحتش لندن ولا باريز
ولا واحد بيبيع حاجة يقول بريال و تاخدها بصاغ
ياخوانا دي حتى الابرة تاخدها بدوشة و قلب دماغ
حلفان و عراك و مناهدة و يمكن ضرب كفوف يا حفيظ
هاتجن ياريت ياخوانا مرحتش لندن ولا باريز
ولا واحدة ف وش الفجر تبرطع مالية الدنيا صواط
قال ايه جوز خالتي ام احمد سلفة اخوها السيد مات
سبحانك ما اعظم شانك والله الموت ده مفيد و لذيذ
حاتجن يا ريت ياخوانا مرحتش لندن ولا باريز
ليست هناك تعليقات:
إرسال تعليق